L'october vegn numnà en bleras linguas il mais dal vin. Gia en il testament da l'uvestg Tello da l'onn 765 vegnan menziunadas vignas. En tut il territori dal Grischun rumantsch, tudestg e talian existan numerus toponims che sa refereschan a vignas – u il num sulet u cun specificaziuns.
A Tumein e Scharàns chattain nus las Vignas Novas, a Pasqual la Vegna dal Pat e la Vegna Plaun dil Male. Quests toponims mussan era che la viticultura na sa limitava betg al Signuradi ed al Mesauc, ma era en Tumleastga, Lumnezia ed en la Foppa vegnivan cultivadas vignas.
A Murissen vegniva fatg beffa dad in pur che aveva plantà uzuers cun als clamar Vegna. A Mustér datti la Spina de vin ed a Sent e Tschlin ils Vinadis.
