Toponims e la refurmaziun

Per finir l'emna deditgada al giubileum da la refurmaziun ans dumandain nus schebain i dettia era nums che la regordan. Sche nus udin a Scuol il num Singion na pensan betg tuts a la claustra da San Jon che sa chattava en quest vitg e che ha dà il num ad ina muntogna ed al bain che tut ils amaturs da chavals conuschan. Era l'alp Passanflurin a Sent zuppa il Prà da San Flurin, il sontg da Ramosch. Suenter la refurmaziun han ins emblidà ils sontgs. Il piz Uter a Zuoz ha la furma dad in altar e sa numna enfin oz uschia, era sche ils Zuozinghers na san apaina tge che è in altar. Pertge sa numna il crap Putèr visavi Ardez uschia era sche ins na vesa betg il territori nua che la glieud discurra puter?
Redacziun: Chasper Pult