Barbara Bush

Ella è stada la dunna ferma davos dus presidents americans, Barbara Bush. La dunna da George Bush e la mamma da George W. Bush è morta en la vegliadetgna 92 onns.

Barbara Bush il 1988 ensemen cun ses um George Bush.
Legenda da maletgs: Barbara Bush il 1988 ensemen cun ses um George Bush. Keystone

Durant 73 onns è Barbara Bush stada maridada cun ses um George Bush. Ensemen han els gì 6 uffants. Dal 1989 fin il 1993 è ella stada la «First Lady».

En ils Stadis Unids è Barbara Bush savens vegnida numnada la tatta da la naziun. Quai pervia da ses chavels argient-alvs, la chadaina da perlas e sia moda e maniera fitg amicabla e cordiala.

Autur/a: Gian Carlo Candinas