Chasa sin temp

Las atgnas quatter paraids – quai è il siemi da blers. Ellas restan savens però er in siemi perquai ch'igl è simplamain memia char. La chasa sin temp pudess esser in'opziun per tuttina vegnir tar l'atgna chasa u abitaziun.

chasa d'ina famiglia
Legenda da maletgs: Cun il model da la 'chasa sin temp' pudess il siemi da las atgnas quatter paraids vegnir pli datiers per in u l'auter. Keystone

L'idea da la chasa sin temp è da cumprar ella be per 30 onns enstagl per vita duranta. Il grond avantatg: Cunquai ch'ins quinta ch'ina chasa nova tegn bun 100 onns, sto il cumprader sin temp er be pajar in terz dal pretsch.

L'auter grond avantatg cumpareglià cun in'abitaziun affittada è ch'ins ha tar quella sin temp tut las libertads. Ins po bajegiar enturn e far autras midadas senza stuair discurrer cun il locatur. Cura ch'ils 30 onns èn passads croda l'abitaziun u chasa enavos en il possess da l'investur.

Betg mo avantatgs

La situaziun giuridica cun dus possessurs d'ina chasa u abitaziun è per exempel actualmain anc fitg cumplitgada. Plinavant na profitescha in possessur sin temp betg sche la valur da l'immobiglia crescha eventualmain. Ed er da vender ina chasa cun data da scadenza è probabel fitg grev.

Fin uss be ina chasa sin temp

Il model n'è anc betg fitg enconuschent. Fin uss datti ina suletta chasa nua che glieud viva en abitaziuns sin temp a Berna. La Scol'auta da Lucerna è dentant persvasa dal model e vul far quel pli enconuschent. Tenor ils experts da Lucerna fiss la chasa sin temp ina buna varianta per famiglias giuvnas u pensiunads che na survegnan betg in'ipoteca da la banca.

Autur/a: Gion Gieri Flepp