Dalai Lama

Il Dalai Lama, il manader spiritual dals budists dal Tibet, è quels dis sin visita en Svizra per il giubileum da 50 onns da l'institut tibetan a Rikon en il chantun Turitg.

Tenzin Gyatso è il 14avel Dalai Lama dals budists tibetans
Legenda da maletgs: Tenzin Gyatso è il 14avel Dalai Lama dals budists tibetans. KEYSTONE

Tenzin Gyatso è il num privat dal 14avel Dalai Lama. Tenzin Gyatso è naschì il 1935 sco figl da purs en il Tibet. Ch'el è la reincarnaziun dal Dalai Lama han ins constatà, cura ch'el aveva dus onns. Tenzin Gyatso ha lura survegnì l'educaziun e la scolaziun a Lhasa en la chapitala dal Tibet per ses pensum sco Dalai Lama.


Il 1959 è il Dalia Lama fugì ensemen cun millis Tibetans da l'occupaziun chinaisa en l'exil a Dharamsala en l'India, nua ch'el viva anc oz cun ses 83 onns. Da là anor porta el ses messadi per pasch e dialog viador en l'entir mund. Il 1989 ha el retschavì il premi Nobel da la pasch per ses engaschi paschaivel da liberar il Tibet da l'occupaziun chinaisa.

Autur/a: Marionna Lombriser