Dis d’acziun senza fin

Ils 16 da settember è il di internaziunal per la protecziun da la sfera d'ozon. Oz è dentant er il di da ramassar crappa, il di da la famigliastra, il di dals geniturs che lavuran u il di da la guacamole: Dis d'acziun datti sco sablun a la mar.

Maletg da simbol.
Legenda da maletgs: Maletg da simbol. Flickr

Cumenzà cun ils dis d'acziun internaziunals ha l'organisaziun da las Naziuns Unidas ONU. L'emprim di han els lantschà l'onn 1947. Fin oz han els rimnà pli che 100 dis spezials. Propostas per in di internaziunal da l'ONU vegnan per il solit fatgas d'organisaziuns statalas u da grondas organisaziuns civilas.

Blers dis d'acziun vegnan dentant duvrads per far reclama per products. In bun exempel è il di dal Son Valentin. Avant quel vegn fatg blera reclama per rosas e tschigulatta. E sch'i na dat nagin di creeschan las uniuns simplamain in agen – per exempel il di dal paun u il di da la gervosa.

Autur/a: Flurin Clalüna