«Easy Rider» – il film ch'ha fatg or da Peter Fonda in'icona

En il film vai per dus umens – Wyatt giugà da Peter Fonda e Billy giugà da Dennis Hopper. Els han fatg raps cun vender drogas. Cun quels raps van els sin lur töffs en viadi tras il sid dals Stadis Unids, adina puspè consumond drogas. 

Peter Fonda durant la filmada da Easy Rider.
Legenda da maletgs: Peter Fonda durant la filmada da Easy Rider. Keystone

Sin lur viadi inscuntran els adina puspè persunas magari interessantas: ina communa da hippies u in giurist cun problems d'alcohol. Ultra da quai vegnan els adina puspè en conflict cun ils Americans pli conservativs. Quels n'èn insumma betg persvas dal stil da viver da Wyatt e Billy.

Il film transporta bain il spiert dals hippies dals onns 60, è da leger en differentas recensiuns da l'onn 1969. La tschertga da la libertad, ina sort spiert da pionier, naginas normas – tut elements dal moviment dals hippies. Da l'autra vart mussa il film er ils cunfins da quella tschertga, quai surtut cun ils cunfins tranter els dus e la populaziun pli conservativa. Quels van uschia vinavant, ch'els mazzan a la fin dal film a Wyatt e Billy. Tenor ina da las recensiuns è il film in autentic purtret dals Stadis Unids e dals conflicts ch'i dat tras ils differents stils da viver.

Autur/a: Flurin Clalüna