Election Hangover u il stress pervi dal cumbat electoral

Passa la mesadad dals Americans e da las Americanas han tenor ina retschertga il nas plain dal cumbat tranter Hillary Clinton e Donald Trump.

Gidanter dal cumbat electoral per Hillary Clinton
Legenda da maletgs: Forsa ha schizunt quest gidanter dal cumbat electoral per Clinton gia in «election hangover». Keystone

En la retschertga da l'assoziaziun da psicologia da l'America han 52% dals participants creschids inditgà ch'il cumbat electoral saja in fitg grond u almain in grond factur da stress. Ina differenza è da vesair tranter quels che han Facebook e quels senza. Tar quels senza han be 45% inditga ch'il cumbat saja in impurtant factur da stress.

L'associaziun da psicologia cusseglia perquai er tranter auter da betg trasor guardar sin Facebook, stizzar la televisiun e da leger be tant ch'ins saja infurmà. Plinavant duajan ins evitar discussiuns memia lungas sur dal cumbat e sa concentrar sin chaussas productivas sco il temps cun la famiglia, lavur en uniuns euv. enstagl da ponderar tge che pudess capitar sch'in u l'auter vegniss president u presidenta. La finala dettia lura era anc persunas che limiteschian la pussanza dal president u da la presidenta.

Autur/a: RTR/ggf