#ENOUGH2018

Cun il motto #ENOUGH2018 cloman oz 40 organisaziun a demonstraziun en la chapitala svizra a Berna. Ils sindicats ed organisaziuns da dunnas pretendan l'egualitad tar las pajas e la fin da la discriminaziun da dunnas.

Oz vign demonstrà a Berna encunter la discriminaziun da las dunnas sco il 1991 u il 2011 il di da la chauma da las dunnas
Legenda da maletgs: Oz vign demonstrà a Berna encunter la discriminaziun da las dunnas sco il 1991 u il 2011 il di da la chauma da las dunnas. KEYSTONE

In tschintgavel pli pauc ch'ils umens gudognan las dunnas en media en Svizra, scrivan ils organisaturs da la demonstraziun en lur appel. Damai che las dunnas prestan era la gronda part da las lavur nunpajadas, manchian ad ellas ver 600 francs mintga mais. Quels daners mancan er a lur famiglias, tar lur prevenziun per la vegliadetgna e la fin finala tar las entradas da taglia dal maun public.


L'egualitad da dunna ed um e francada dapi 37 onns en la constituziun, dapi 22 onns è la lescha d'egualitad en vigur, tuttina sajan las dunnas anc adina sutrepreschentadas en ils gremis da pussanza, da la politica e da l'economia. Cun la demonstraziun dad oz suentermezdi a Berna pretendan las 40 organisaziuns la fin da la discriminaziun.

Autur/a: Marionna Lombriser