Fidel Castro

Oz è mort Fidel Castro, il bab da la revoluziun cubana en la vegliadetgna da 90 onns. Fidel Castro è stà quasi in mez tschientaner ditg schef dal stadi cuban, davent dal 1959 enfin il 2008.

Fidel Castro, qua anc avant 10 onns. Oz è el mort en la vegliadetgna da 90 onns.
Legenda da maletgs: Fidel Castro, qua anc avant 10 onns. Oz è el mort en la vegliadetgna da 90 onns. keystone

Fidel Castro è il figl dad in possessur dad ina plantascha da channa da zucker Angel Castro e sia cuschiniera Lina Ruz. Sper il frar Raul che ha surprì las fatschentas ed il presidi da Fidel l'onn 2008 ha el er anc il frar e quater soras sco er trais mez fragliuns. Era sche la famiglia è stada ritga è Castro ì a scola cun uffants da famglias povras. Fidel Castro ha studegià giurisprudenza a l'universitad da Havanna ed ha avert l'onn 1950 ina chanzlia d'advocat a Havanna. El ha dentant pli gugent fatg politica.

Ed uschè ha el cumenzà cun la revoluziun cunter il dictatur Fulgencio Battista. El ha cumbattì, attatgà, è stà en praschun ed avant dretgira. Planisà la revoluziun ha el tranter auter er a Mexico ensemen cun ses collega argentin Che Guevara e cun Alberto Bayo da Cuba, che ha introducì Castro en la tactica da guerilla. L'onn 1959 ha el lura cupitgà Battista e sia regenza pro americana e instradà ina regenza communistica.

L'America ha gì nagin gust da in stadi communistic uschè datiers. Castro ha lura era bainspert statalisà firmas americanas, l'America ha reagì sin quai cun in embargo. Il zenit da la dispeta tranter ils Stadis Unids da l'America e Cuba è probablamain stà la crisa da Cuba da l'onn 1962, cura che Castro è s'allià cun Moskau e vuleva staziunar rachetas sovieticas a Cuba, quai che avess bunamain dà ina guerra nucleara. Pir lura sut Raul Castro e sut Barack Obama èn ils stadis puspè s'avvischinads.

Autur/a: RTR/sb