Georges Auguste Escoffier

Tgi che ha gugent la haute cuisine enconuscha garantì el: George Auguste Escoffier, il meister-cuschinier franzos da renum mundial. Naschì oz avant exact 170 onns. E tgi che n'enconuscha betg Escoffier sez, enconuscha garantì in dessert ch'el ha inventà: il pêche melba.

Anc adina vegn cuschinà sin l'entir mund tenor la scola da Auguste Escoffier.
Legenda da maletgs: Anc adina vegn cuschinà sin l'entir mund tenor la scola da Auguste Escoffier. Reuters

Pêche melba è dentant dapli che be in persic ord la cuppa sin glatsch da vaniglia. En il rezept original vegn il persic stufà en ina maschaida d'aua e zutger, mess sin glatsch e surtratg cun puré d'ampuaunas.

L'inventader Georoges Auguste Escoffier ha cuschinà quasi si'entira vita. Cun 13 è el ì tar ses aug en emprendissadi e cun 18 onns ha el gia surpiglià la cuschina da l'hotel Bellevue datiers da Nizza. Pli tard ha el midà en il Petit Moulin Rouge a Paris.

Schizunt durant la guerra tranter ils Franzos ed ils Tudestgs ha Georges Auguste Escoffier cuschinà. L'emprim per il stab general franzos, lura en l'arrest tudestg. Cura ch'el è puspè vegnì liber ha el cuschinà enavant - per il César Ritz a Monte Carlo ubain per il Savoy u il Ritz Carlton a Londra.

Cun ses Guide Culinaire ha Escoffier lura definitivamain survegnì renum mundial. Quai cudesch vala sco la basa, quasi la bibla per la cuschina dal 20avel tschientaner.

Autur/a: RTR/sb