Homeschooling

L'instrucziun dals uffants a chasa è cunzunt ferm derasà en l'America u il Canada. Ma er en Svizra vegnan passa 2'000 uffants instruids a chasa ed il dumber crescha cuntinuadamain. En il Grischun datti enfin uss però be 4 cas.

Mamma ch'instruescha ses figl a chasa en stiva.
Legenda da maletgs: Instruir ils agens uffants a chasa vegn pli e pli popular er en Svizra. Keystone

Tenor ina retschertga dal Tagesanzeiger èn il chantun Vad cun 650 uffants e Berna cun 576 affons a la testa en chaussa homeschooling. En 10 chantuns na datti insumma nagins cas nua ch'uffants vegnan instruids a chasa.

Grondas differenzas en leschas da scola

Cunquai che las leschas da scola èn chaussa dals chantuns datti fitg grondas differenzas. En tscherts chantuns sco Vad u Berna po quasi mintginA instruir a chasa. En auters sco p. ex. il Grischun, Uri u er il chantun da Lucerna dovrì in diplom u studi da scolastA sin quel stgalim ch'ins vul instruir. E puspè auters chantuns sco il Tessin u il Vallais na lubeschan insumma nagin homeschooling.

Arrivà sin il palc politic naziunal

Las opiniuns pertutgant l'instrucziun a chasa van ina ord l'autra. Ils ins èn da l'avis ch'ils uffants han gronds deficits tar contacts socials sch'els vegnan instruids a chasa be en il ravugl da la famiglia. Auters vesan cunzunt l'avantatg da pudair structurar pli flexibel il di u da vgnir a frida meglier cun il squitsch da la scola.

Cunquai ch'il dumber dad uffants che vegnan instruids a chasa crescha però, ha il cusseglier naziunal socialdemocratic Adrian Wüthrich inoltrà ina moziun. Cun quella vul el cuntanscher almain intginas reglas liantas che duain valair en tut ils chantuns.

Sco p. ex. la cundiziun d'avair in diplom u studi da scolast per pudair instuir a chasa. Quai era en vista che mintga uffant duai avair las medemas premissas cun la scolaziun. Saja quai lura via instrucziun a chasa u en la scola populara.

Autur/a: Gion Gieri Flepp