Lindenstrasse

Il mars 2020 chala l'emettur da televisiun ARD cun la seria Lindenstrasse.

Hans W. Geissendörfer, l'inventader da la seria Lindenstrasse il 2010 tar il giubileum da 25 onns
Legenda da maletgs: Hans W. Geissendörfer, l'inventader da la seria Lindenstrasse il 2010 tar il giubileum da 25 onns. KEYSTONE

Il december 1985 ha l'emprima seria da savun tudestga gì premiera. Durant ils decennis è la Lindenstrasse daventada cult ed ina icona da la televisiun tudestga. Emna per emna mussa la seria a moda realistica la vita ed il destin da las vischinas e dals vischins ch'abiteschan en la Lindenstrasse a Minca.

La seria tematisescha la vita da mintgadi cun ses plaschairs e quitads, naschientschas, nozzas, mortoris, malsognas u crisas da famiglias. La seria ha sur ils decennis er adina puspè integrà tematicas da la discussiun publica sco problems da drogas, extremissem u dischoccupaziun. Cun las istorgias da sias figuras ha ella era chapì da dar infurmaziuns tar l'omosexualitad per exempel u l'emancipaziun.

Questa dumengia pon ins guardar la 1'696avla episoda ed il mars 2020 chala l'ARD cun la Lindenstrassa per motivs da spargn e perquai che l'interess dals aspectaturs tschessa d'in cuntin.

Autur/a: Marionna Lombriser