Missouri River

Il pli grond flum da l'America dal nord metta actualmain sut l'aua grondas parts da Nebraska, sco era parts dad Iowa, Wisconsin e South Dakota. Perquai ch'il flum cuntigna blera lozza vegn el era numnà «Big Muddy».

L'aua gronda dal Missouri River ha inundà ina part d'ina plazza aviatica a Nebraska.
Legenda da maletgs: Sco qua tar ina plazza aviatica a Nebraska datti er en ils stadis federativs South Dakota, Wisconsin, Illionis e Minnesota. Keystone

Il Missouri River sez ha ina lunghezza da 4'087 km. Sch'ins quinta el però sco part dal Mississippi lura vegnan els sin 6'051 km. Il Missouri River s'unescha numnadamain datiers da St. Louis al cunfin cun Illinois cun il Mississippi.

Tras in sisavel dals Stadis Unids

Sco funtaunas dal Missouri River valan trais flums che han lur origin en ils Rockymountains: Il Jefferson en ils culms en il sidvest da Montana, il Madison che vegn nà dal parc naziunal Yellowstone e sco terz, il Gallatin River. Cura che quels trais flums s'uneschan tar Three Forks nescha il Missouri. Suenter va el tras North e South Dakota, Nebraska, Iowa, Kansas e Missouri e piglia cun el anc inqual flum lateral.

Impurtanza istorica

Ses num ha il flum dals emprims abitants en la regiun d'origin dal Missouri. Els eran enconuschents per lur bartgas, fatgas or d'in sulet pign e betg sco ils canus d'auters pievels da lez temp.

Il Missouri è stà in'impurtanta ruta per extender ils giuvens Stadis Unids da l'America, Era per chattar la via tar il Pacific. Avant il temp da la viafier era il flum in'impurtanta ruta per transportar rauba e persunas. A partir dal 20avel tschientaner èn lura vegnids erigids mirs da fermada per ovras electricas e per indrizs da sauar.

Autur/a: Gion Gieri Flepp