Prinzi Charles festivescha 70

Entant che auters èn gia pensiunads è el quasi anc en emprendissadi: Prinzi Charles, dapi passa 60 onns prinzi, festivescha oz ses natalizi. Il tron na datti dentant anc betg.

Prinzi Charles festivescha oz ses 70avel.
Legenda da maletgs: Prinzi Charles festivescha oz ses 70avel. keystone

La Queen na vul anc betg demissiunarn uschia che prinzi Charles sto cun ses 70 onns anc spetgar in zic sin il tron. Singuls pensums ha el dentant schon surprendì, per exempel maina el il Commonwealth, ils stadis federativs d'anteriuras colonias da l'Empire. Sin natalizi datti per il prinzi ina munaida da 5 pfund cun ses conterfei. E sco turta ina petta da carottas. Quai ha il cuschinier Anton Mosimann tradì al «Blick». E sche la petta na vegn betg mangiada, dat quai damaun anc rests – prinzi Charles na bitta numnadamain betg gugent davent il mangiar, uschia ch'i dat er en chasa royala magari rests. Autras marottas dal prinzi: El lascha mintga di far ora cun il fier ses pigiama avant che trair en el e vul che la pasta da dents saja gia pronta sin il barschun da dents cura ch'el leva. Ils Brits han dentant survegnì pli e pli gugent lur prinzi. Durant la lètg dramatica cun Diana haja prinzi Charles ditg gì il renum dad esser fraids e senza cor. Dentant cun educar prinzi William e prinzi Harry haja el mussà autras varts da sia persunalitad.

Autur/a: Sabrina Bundi