Togliatti

En la citad russa Togliatti ha la squadra da ballape svizra ses quartier durant il campiunadi mundial da ballape. La citad ha ses num dal politicher talian Palmiro Togliatti.

La citad russa Togliatti è in center d’industria e da sport
Legenda da maletgs: La citad russa Togliatti è in center d’industria e da sport. KEYSTONE

Il 1964 ha la citad russa Stawropol-Wolschskij survegnì il num Togliatti per render onur al politicher communist da l'Italia Palmiro Togliatti (1893–1964). Togliatti è stà secretari general da la partida communistica da l'Italia, el ha er fatg part da la regenza taliana e dal parlament talian.

Durant la dictatura faschistica en l'Italia ha Togliatti vivì en l'exil per insaquants onns en l'Uniun sovietica. Pli tard ha el gidà da fundar la fabrica d'autos Lada en la citad Stawropol-Wolschskij en collaboraziun cun Fiat. A Togliatti sa chatta oz la pli gronda industria d'autos da la Russia.

La citad Togliatti ha var 700'000 abitants ed è situada 1000 km davent da Moscau en il sidvest da la Russia.

Autur/a: Marionna Lombriser