Tweets che han fatg furora

Ozendi sa derasan novitads entaifer secundas, quai era grazia Twitter, la plattafurma soziala cun ils 140 segns. E la plattafurma Twitter festivescha oz 10 onns.

Display d'in handy cun logo dal Twitter.
Legenda da maletgs: Twitter festivescha oz 10 onns. KEYSTONE

Sch'i havess gia dà Twitter cura che John F. Kennedy è vegnì assassinà u cura ch'il mir da Berlin è crudà, lura fiss Twitter segir schluppettà.

Tweets che han fatg furora sin l'entir mund
Sch'ina persuna renumada è morta vegn quai era commentà sur Twitter. Sco tar Michael Jackson, Amy Winehouse u era politichers sco Helmut Schmidt, anteriur canzelier da la Germania. Il mund prenda cumià.

In cas tut spezial
In utilisader da Twitter (Sohaib Athar) ha derasà la mort dal terrorist Osama Bin Laden, senza savair quai. El era in vischin e ha scrit la notg da la mort: «In helicopter è sgulà sur Abbottabad, l'ina da la notg, quai è in eveniment singular». Là saveva el natiralmain anc betg, che quai era ina operaziun top secreta dal malitar american. El ha scrit vinavant fin ch'el ha chapì tge ch'el ha vis. Lura ha el scrit «Oh, oh jau sun quai tip che ha rapportà da la mort da Bin Laden, senza savair quai».

Pir uras pli tard ha Barack Obama confirmà uffizialmain la mort d'Osama Bin Laden. Ed Obama ha era fatg quai via Twitter. Barack Obama è era stà l'emprim president che ha nizzegià Twitter per engraziar al pievel per l'elecziun, quai direct dal White House.

Autur/a: RTR/cl