La colliaziun tranter il nord ed il sid è gia adina stà in tema da discussiun ed il project «Alptransit» occupescha oramai dapi onns intensivamain las medias tessinaisas e svizras. I manca pauc fin l'inauguraziun dal pli grond tunnel da viafier dal mund ch'è previs il prim da zercladur da quest onn.
Il tunnel da l'avegnir n'è dentant betg be da grond interess per la tecnica ma er in lieu d'inspiraziun per l'art. Dacurt è vegnì publitgà il roman «Gotthard» da Zora del Buono che ha propi lieu en il tunnel da basa da l'Alptransit. Dapli da quest roman rapporta nossa correspundenta Mirella Zen.
