La 'Galère' u la 'Neptune' - bartgas istoricas

Nossa correspundenta da Genevra ans maina oz sin il Lac Léman per ina spassegiada en temps passads. Cun la Galère u la Neptune faschain nus in sigl enavos en l'istorgia da la navigaziun.

Las bartgas istoricas sin il lac Léman
Legenda da maletgs: Las bartgas istoricas sin il lac Léman keystone

La Galère è vegnida fabritgada la fin dal 20avel tschientaner tenor in model dad ina galera dal 1750. Grazia ad in project per dar lavur a 600 mastergnants dischoccupads pervi da la crisa dals onns 90. In'imposanta bartga da lain. La segunda è ina bartga fabritgada il 1904. Ella è vegnida restaurada gia duas giadas. Pli baud vegniva questa bartga duvrada per il transport da material da construcziun per chasas e vias a Genevra. Il viadi per transportar sablun, crappa ubain er laina durava tranter 6 e 24 uras. Omaduas bartgas pon ins reservar per excursiuns sin il lai ubain per eveniments sco nozzas, festas da famiglia ed uschia vinavant. Ellas van cun vela e cun motor.

Autur/a: RTR/sc