America: «A horse with no name»

il principi dals onns 70.
Legenda da maletgs: Keystone

Il 1971 cumpara in chanzun in pau strana, cun in text quasi surreal dad in chavagl senza num entamez in desert. El è daventà in grond hit, l'unic semperverd per la band «America».

Ils baps da Dewey Bunnell, Gerry Beckley e Dan Peek eran schuldaus americans staziunads in Gronda Bretagna, ed il 1969 han els funda lur emprima band. Il 1971 survegn quella il num «America» e cun lur emprima single han els lur emprim ed er lur pli grond success. L'inspiraziun per la chanzun survegnan els en il studio da registrar da Arthur Brown a Dorset. Là penda in poster d'in purtret enconuschent da Salvador Dali, quel cun in chavagl en ina cuntrada surreala. Quista impreschiun ed ina regurdientscha che Dewey Bunnell ha dal desert da Arizona e New Mexico èn la basa per sia cumposiziun. Cur che la chanzun cumpara datti dus sorts da reacziuns. Ils ins crajan ch'ella descriva experientschas cun drogas e perquai vegn la chanzun sin la glista naira da pliras staziuns da radio. Auters èn fascinats da l'atmosfera dal toc e quel raiva spert sin l'emprima plazza da la parada da hits americana e sin la terza in Gronda Bretagna. In success che «America» na rivan mai pli da repeter.

Autur/a: Jachen Prevost