Antonello Venditti: «Grazie Roma»

il grond chantautur da Roma
Legenda da maletgs: Keystone

Ils gronds chantauturs talians han fascinà ed influenzà ina generaziun intera. Fabrizio de Andrè, Lucio Dalla, Francesco de Gregori ed er Antonello Venditti. El è naschì ils 8 da mars dal 1949 a Roma ed è in dals gronds «cantautori» talians. Ses tocs «Buona domenica», «Segreti» ubain «Questa insostenibile leggerezza dell'essere» èn gronds semperverds, enconuschents en tut l'Italia.

En sias chanzuns tematisescha Venditti surtut sia citad natala. Ina da quellas chanzuns è deditgada a ses club da ballapè, la «AS Roma». Quel exista già dapi il 1927, però en tut quels onns ha el gudagnà be trais giadas il titel da campiun talian. Per la segunda conquista dal «scudetto» il 1983 ha Antonello Venditti cumponì «Grazie Roma» – e quella chanzun è daventada l'imni dals fans. Savens n'han els betg motiv da festivar, la primavaira passada dentant ha lur club eliminà il FC Barcelona en la Champions League, e lura han els puspè chantà «Grazie Roma».

Autur/a: Jachen Prevost