Corin Curschellas: «Sch’eu füss ‘na randulina»

Corin e sia band
Legenda da maletgs: MAD

«La Grischa», «La Triada», «Origins» – ed uss «La Nova». Quai è il quart disc da Corin Curschellas che s'occupa da chanzuns popularas rumantschas en differentas interpretaziuns novas.

Questa giada va ella en direcziun da jazz, experiments ed improvisaziuns. Uschia survegnan «Il gran es fat aint», «Ai buna sera beala», «Eu vögl bain a mia bella» e 14 autras chanzuns in vestgi dal tuttafatg nov. Pliras èn fitg popularas, autras plitost pauc enconuschentas ed in per schizunt emblidadas. Ina che blers han fitg gugent è «Scheu füss 'na randulina».

Vera Kappeler, piano, Peter Conradin Zumthor, battaria e percussiun, Anna Trauffer al contrabass e Markus Flückinger, orghelin da sviz – che ha er arranschà ina gronda part dals tocs – accumpognan a Corin e cun «La Nova» procuran els per in cuntrast en congual cun las chanzuns a capella da «La Triada» ubain cun quellas en stil popular da «Origins».

Autur/a: RTR/jp