Diabolics: «Cowboy grischunais»

Diabolics
Legenda da maletgs: MAD

Ils «Diabolics» èn ina furmaziun zund speciala, schizunt da cult, ina gruppa da rock che fa musica cun texts jauers, il rumantsch da la Val Müstair. Dapi il 1996 èn els activs ed han fatg 3 discs: «Do da glüna» cul hit «Jau ta n'ha jent» dal 1998, «Bandunà» dal 2010 – ed uss cumpara «Per sbrüer!» Ivan Zangerle, Johnny Peterelli, Martina Marcona, Arno Forrer ed Adom Moser preschentan puspè atgnas cumposiziuns en lur stil tipic, cun texts ironics, umoristics e cun balladas. Tuns pulitamain novs datti tar il «Cowboy grischunais», cler er cun elements da la musica da country e cun ina descripziun divertenta dal tipus «abitant muntagnard grischun». Minchatant è el chau dir, malziplà e sulvadi. Pero atgnamain ha el in bun cor e stat cun ses pes sin terra.

Autur/a: RTR/jp