Ennio Morricone: «Il buono, il brutto, il cattivo»

Il grond cumponist da musica da film
Legenda da maletgs: Keystone

La sonda passada ha Ennio Morricone festegià ses 90avel. El è vegni enconuschent cun sia musica per sur 500 films, surtut per quels dal gener «italowestern» da Sergio Corbucci e Sergio Leone. Tuts enconuschan la melodia dal film «Spiel mir das Lied vom Tod», in classiker dal italowestern dal 1968. Morricone è stà in expert cur chi sa tractava da stgaffir atmosferas da acziun, tensiun e pel-giaglina. Gia dus onns pli baud ha el cumponì la musica per in auter classicher da Leone, per «Il buono, il brutto, il cattivo». Là èn da vesair ils trais aventuriers e lumbarduns Clint Eastwood, Eli Wallach e Lee van Cleef ed il film plain tensiun e violenza vegn accumpognà e rinforzà da la musica da Morricone. Il toc principal cumenza cun in tschivlitgar, suenter vegnan flautas ed ina ocarina, e tensiun ed intensitad creschan cun ils tuns da las ghitarras smanatschantas. Il film è stà in grond success, malgrà tut las objecziuns criticas, ed er il disc cun la musica da Morricone. Quel è rivà fin sin plazza quatter da la parada da Billboard, per in disc cun musica da film in grond success.

Autur/a: Jachen Prevost