Gene Autry: «Rudolph the red-nosed reindeer»

Actur, chantadur ed entertainer
Legenda da maletgs: Reuters

La chanzun cun il pli grond success ed ina vendita da 150 milliuns exemplars è «White Christmas» dal cumponist american Irwing Berlin. La versiun la pli enconuschenta è quella da Bing Crosby dal 1947.

In'autra chanzun da Nadal cun in success sumegliant è «Rudolph, the Red-Nosed Reindeer», ina cumposiziun da Johnny Marks. Quella è cumparida be dus onns pli tard ed è er daventada in grond semperverd. La chanzun sa basa sin ina figura d'in film animà ch'il quinà da Johnny Marks aveva creà, in pitschen ren cun in nas cotschen.

L'emprima versiun cun il chantadur Harry Bannon è cumparida il november dal 1949. Be pauc pli tard è suandada la versiun da Gene Autry, in actur e chantadur texan che sa preschentava savens sco cowboy, e quella è lura vegnida nr. 1 en l'America durant l'emna da Nadal. En ils onns seguents hai lura dà in'inflaziun da versiuns da la chanzun da stars sco Bing Crosby, Ella Fitzgerald, dals Temptations e da Ray Charles – ed er d'interprets sco Richard Clayderman e Michael Bublé. Ed er quests dis è «Rudolph, the Red-Nosed Reindeer» d'udir dapertut.

Autur/a: Jachen Prevost