Ladysmith Black Mambazo: «Homeless»

il chor enconuschent da l'Africa dal Sid
Legenda da maletgs: Youtube

Il 1964 vegn fundà en l'Africa dal Sid in chor – ina furmaziun a-cappella – che daventa famus e che preschenta sias vuschs fantasticas sin l'entir mund.

Joseph Shabalala e sia furmaziun «Ladysmith Black Mambazo» chantan tar nozzas ed autras festas. Els vulessan er participar ad ina concurrenza da chors, però senza success. Els sajan memia buns e professiunals. Uschia fan els il 1973 l'emprim disc. Lur chanzun clav è «Homeless», ina chanzun en la lingua dals Zulu che ha sias ragischs en las tradiziuns da sa maridar, cura ch'il spus sa preschenta a la spusa.

Cun questa chanzun cun lur vuschs fenomenalas èn els vegnids enconuschents, e pli tard fan els grazia a Paul Simon carriera mundiala. Els èn la furmaziun la pli prominenta da l'Africa dal Sid ed han fatg sur 50 albums.

Autur/a: Jachen Prevost