Led Zeppelin: «Stairway to Heaven»

cun Robert Plant e Jimmy Page
Legenda da maletgs: Reuters

In november dal 1971 è cumparì in dals discs ils pli legendars da la musica da rock. Ils protagonists: Jimmy Page, Robert Plant, John Paul Jones e John Bonham, lur band: Led Zeppelin, e lur disc senza num ha survegni il titel «Led Zeppelin IV». Il medem mument hai dà «Stairway to Heaven» sco single.

Il toc cumponi da Page e cun text da Plant ha dovrà emnas ed emnas fin tar la versiun definitiva. A l'entschatta era quai be in'idea cun fragments che Page aveva collecziunà sin in apparat da registrar. En ina chamona a Wales è tut daventà pli concret, ed el ha fatg pass per pass e sviluppà la chanzun. In bel di, cur ch'el l'ha sunà en preschentscha da Plant ha quel cumenzà a far notizias e pauc suenter a chantar.

«Stairway to Heaven» sa cumpona da 3 parts, e cun mintgina vain il toc pli intensiv, pli energetic e pli spert. L'emprim la ballada subtila, a la fin il toc rockus, cun il solo da ghitarra da Jimmy Page ed il chant fervent da Robert Plant.

Led Zeppelin: Stairway to Heaven

Autur/a: RTR/jp