Lyle Lovett: «The road to Ensenada»

in che fa perlas da country e folk
Legenda da maletgs: Keystone

Il Texan Lyle Lovett è stà maridà cun l'actura Julia Roberts, perquai è el cumparì savens en ils magazins da prominents. Bler pli interessant è el sco musicist, in chantautur da country cun bleras qualitads.

Il 1997 survegn el in Grammy per ses 6avel disc «The road to Ensenada». Quai saja il meglier disc da country da l'onn e la chanzun cun il medem titel è pli probabel la pli bella chanzun ch'el ha cumponì. El vegn accumpagnà da musicistas e musicists da renum sco Jackson Browne, Shawn Colvin e Randy Newman – e la chanzun è ina perla zuppada ch'i vala la paina da scuvrir.

I va sco savens per l'amur, in'amur che vegn betg accumplida. El è ad Ensenada en il Mexico, sa senta mal ed ha rut il cor, spetga però anc adina sin sia marusa e pensa a ses dachasa. La chanzun è plain tristezza e melanconia e Lovett chanta ella, sco sche quai fiss sia atgna desperaziun. Forsa raquinta el er da sia relaziun cun Julia Roberts e da lur separaziun.

Autur/a: Jachen Prevost