Patti Smith: «Because the Night»

Patti Smith sil palc
Legenda da maletgs: Keystone

Patti Smith è naschida ils 30 da december 1946 a Chicago, però sia musica e ses engaschament sa concentreschan sin New York. Il 1967 è ella rivada a Manhattan, ha cumenzà a far musica da punk ed art, ha scrit artitgels per il «Rolling Stone» – ed ha inscuntrà il fotograf Robert Mapplethorpe che ha er fatg pli tard ils purtrets per las cuvertas da ses discs. Lur relaziun intensiva e turbulenta ha dà energia ed il 1975 è cumparì ses disc «Horses» che vala sco ses pli impurtant.

Ses pli grond hit è però da chattar sin «Easter», cumparì 3 onns pli tard, e quella chanzun ha ella survegnì da nagin auter che Bruce Springsteen. El aveva l'impressiun che sia chanzun fiss sco fatga aposta per la vusch da Patti Smith. E quai è lura er daventà ses pli grond hit. E mintgatant, durant in da ses concerts vegniva il ««Boss» schizunt sin il palc per l'accumpagnar. Springsteen sez n'ha mai registrà quest toc, però sin sias turneas è el savens en il program.

Autur/a: Jachen Prevost