Scorpions: «Wind of change»

la band da rock dir da Hannover
Legenda da maletgs: Keystone

La band da rock da Hannover «Scorpions» ha il 1984 ses emprims gronds hits cun «Rock you like a Hurricane» e «Still loving you». 5 onns pli tard cumpara lur pli grond hit, che daventa l'imni da la midada: Ils 9 da november dal 1989 croda il mir da Berlin, il mir ch'aveva separà blers onns la citad ed ils dus stadis tudestgs, in eveniment istoric sco consequenza da la politica da detensiun, las midadas en l'Uniun Sovjetica e la fin da la guerra fraida.

Quella giada eran ils «Scorpions» sin tournea, ed a Moscau senta lur chantadur Klaus Meine in'atmosfera differenta, in auter vent, il vent da la midada. Il 1989 cumenza el a cumponir la chanzun «Wind of change» e quella cumpara il schaner dal 1991 sco single da l'album «Crazy World». Ina ballada perfetga per quels dis da speranza, in imni cun tuns che van spert en l'ureglia, il tschivlar da Klaus Meine, il solo da ghitarra da Rudolf Schenker ed il text che discurra dals sains da la pasch e dad in eveniment incredibel, che pareva paucs onns avant anc absolutamain impussibel.

Autur/a: Jachen Prevost