The Band: «The Weight»

la gruppa famusa da la fin dals onns 60
Legenda da maletgs: Keystone

Il 1968 cumpara l'emprim disc d'ina furmaziun che sa numna simplamain «The Band». Ella daventa legendara sco band che influenzescha fermamain la musica da pop e rock americana ed er sco band accumpagnanta da pliras turneas da Bob Dylan.

Sin «Music from the big Pink», il debut da la „Band datti surtut in toc che daventa enconuschent. «The Weight» è ina cumposiziun da Robbie Robertson. El è canadais cun ragischs indianas e tar la famiglia da sia mamma che viva en il reservat da las «6 naziuns» emprenda el a sunar la ghitarra. Il 1968 daventa el commember dal quintet «The Band» cun ils musicists da renum Levon Helm, Rick Danko, Richard Manuel e Garth Hudson. E Robertson daventa spert il cumponist principal, scriva semperverds sco «The Night They Drove Old Dixie Down» e surtut «The Weight». Quai è ina chanzun en stil da folk dal sid dals Stadis Unids, cun elements da country, in toc che accumpogna Robertson e ses collegas durant blers onns, fin dal 1977 tar l'emprima separaziun. «The Weight» è er in da lur tocs impurtants tar lur concert dal 1969 a Woodstock, ed el cumpara sin il soundtrack dal film «Easy Rider». Pli tard datti discussiuns pervi dals dretgs dautur. Levon Helm pretenda che tut ils commembers da la band hajan gida a cumponir la chanzun, e che Robertson na saja betg sta sulet a far la lavur.

Autur/a: Jachen Prevost