Tom Petty and the Heartbreakers: «American Girl»

Il chantadur e ghitarrist american
Legenda da maletgs: Keystone

I dat musicists e cumponists che han in stil incumparabel. In da quels è l'american Tom Petty, annada 1950. Cun sia band «The Heartbreakers» ha el registrà ina lingiada tocs ch'ins enconuscha immediatamain, pervi da las ghitarras, la vusch da Petty e ses ritmus.

Tut quai ha cumenza avant 40 onns cura ch'i han publitgà lur emprim disc «Tom Petty and the Heartbreakers» cul toc: «American Girl». In toc da rock simpel e direct, cun in bel tempo emprestà da Bo Diddley, dus ghitarras, bass, batteria ed in pau keyboard. Quel toc è lura stà model per blers auters che Petty e ses Heartbreakers han fatg pli tard – e cun bler dapli success. Pertge «American Girl» n'ha betg tuc quella giada dal 1976 il gust dal public american, sulettamain en Engalterra hai dà in per fans. Pli tard han els lura gì gronds hits sco «Refugee», «Learning to Fly», ed «Into the great wide open». E cun ils «Traveling Wilburys» ha Petty lura eir fatg musica: ensemen cun ses amis Bob Dylan, Jeff Lynne, George Harrison e Roy Orbison.

Tom Petty & The Heartbreakers: «American Girl»

Autur/a: RTR/jp