En l'umbriva: La sinfonia nr. 4 da Beethoven

Ludwig van Beethoven (1770-1827) ha cumponì nov sinfonias e tuttas èn singularas, nagina sumeglia l'autra. Ordvart enconuschentas èn la terza, la tschintgavla u la novavla. Pli pauca attenziun retschaiva la quarta sinfonia. Auter è quai en quest'emissiun.

Mesa statua da Ludwig van Beethoven, creà da Hugo Hagen.
Legenda da maletgs: Mesa statua da Ludwig van Beethoven, creà da Hugo Hagen. PIXABAY

Cunzunt tranter la terza sinfonia da Beethoven, la Eroica e la tschintgavla l'uschenumnada «Schicksalssymphonie», resta la quarta sinfonia da Beethoven magari en l'umbriva. Robert Schuman ha descrit la quarta sinfonia suandantamain: «Eine griechisch schlanke Maid zwischen zwei Nordlandriesen».

Il maletg d'ina fina matta tranter dus gigants circumscriva la moda co la quarta sa differenziescha da las sinfonias vischinas. Quai sa mussa per exempel er en la dimensiun da l'orchester. En nagin'autra sinfonia dovra Beethoven in orchester uschè pitschen.

En quest'emissiun vegn la sinfonia nr. 4 da Beethoven enramada da duas uverturas: «Die Geschöpfe des Prometheus» e «Leonoren-Ouvertüre Nr. 3».

Redacziun: Yvonne Simmen