Nus avain novas

Insatge han ils dus musicists dad oz communabel - lur armonica ... quella na dastga betg mancar! Er la via da success para da funcziunar tar Marc Pircher sco er tar la Melissa Naschenweng.

Melissa Naschenweng durant in concert.
Legenda da maletgs: Melissa Naschenweng durant in concert. MAD

Marc Pircher, il «ErVOLKSmusiker» da Ried en il Zillertal po festivar quest onn ses 25avel giubileum da tribuna ed el ha edì per quest onn da festa in disc cun il titel «Warum gerade ich». Co quest album tuna pudais vus tadlar en La stailalva.

Plinavant tadlain nus il segund disc da studio da la Melissa Naschenweng cun il titel «Kunterbunt». La giuvna da 27 onns da Villach en Austria è ina dunna cun bler power ed er ella va gia da success tar success. Pia, in album cun ina mixtura da musica da pop, schlagher, musica instrumentala e natiralmain adina d'udir è sia armonica.

E cun in zichel fortuna pudais vus gudagnar il disc da la Melissa Naschenweng. Bun divertiment e buna fortuna!

Autur/a: Christa Soliva