Conrad Jon Godly: Tschiffar la forza da la natira en maletgs

Suenter ses studi d'art a Basilea en ils onns otganta, fa il Grischun Conrad Jon Godly in viadi en ils Stadis Unids da l'America. Là, cumenza el a fotografar e bainprest daventa la fotografia ses mastergn. Durant bunamain ventg onns purtretescha el stars e prominents per illustradas e reclamas.

En il 2004 ha Conrad Jon Godly dentant avunda da quest mund glamurus. El lascha encrescher per sias ragischs geograficas ed artisticas. Uschia turna el en il Grischun, viva intgins onns en la tegia da ses tat e cumenza puspè a malegiar. Ma ils emprims onns na mussa el betg ses maletgs – quai èn onns d'exercizi, per na dir da catarsis. Il motiv central ch'accumpogna el dapi ses return: las muntognas e la forza da la natira che po metter nus carstgauns sin pantun.

Bun diesch onns èn passads dapi che Godly ha lantschà sia segunda carriera: enstagl da viagiar tras il mund per fotografar stars, fa el ussa viadis per assister a las vernissaschas da sias exposiziuns!
Per il mument èn diversas ovras dal pictur artist da vesair en la Stalla Madulain, quai ensemen cun ovras da l'artista giapunaisa Kazuyo Okushiba.

Autur/a: Astrid Alexandre