Geniturs che mazzan lur figl ed autras paraulas

En l'ustaria Dolmetsch a Domat vegn il figl mazzà da bab e mamma. Il medem capita en la ditga da «La tga arsa» sin il Pass dal Güglia. En l'ustaria Capricorn a Bos-cha persuenter mazza la mamma ses figl ed en in'autra versiun è il bab l'assassin. Ma quai n'è betg tut! La ditga dals geniturs ranvers che mazzan lur figl sa chatta er en autras terras da l'Europa e perfin en il toc da teater «Le malentendu» dad Albert Camus. - Co èn questa ed autras ditgas e bleras paraulas internaziunalas vegnidas en il Grischun? - Quai e dapli vul il Magazin da cultura savair da l'experta da las paraulas grischunas Ursula Brunold-Bigler che vegn undrada questa fin d'emna a Cuira cun il Premi da paraulas svizzer 2017. Tiers quai dain nus in sguard en il ses pli nov cudesch «Kleine Kulturgeschichte der Bündner Märchen». La surdada dal premi e la preschentaziun dal cudesch han lieu en rom dals Dis da las ditgas e paraulas alpinas a Cuira.


En la rubrica litteratura preschenta Esther Krättli la collecziun «201 Proverbis, tradüts da Not Vital in pled da Sent». I sa tratta dad ina collecziun da proverbis chinais che l'artist enconuschent ha edì en furma da cudesch.

Contribuziuns

Redacziun: Rafael Müller