«La melodia è gia scritta en la poesia»

Per il project REMAS ha Mario Pacchioli mess en musica poesias rumantschas per chant ed orchester sinfonic.

Muoth, Tuor, Camathias: Lur nums stattan per la poesia sursilvana. Mario Pacchioli ha scrit arranschaments per orchester sinfonic e clavazin per 18 poesias sursilvanas. Sias cumposiziuns èn influenzadas da la chanson franzosa e da la canzone taliana e dattan in nov vestgì a las poesias rumantschas.

Cudesch cun poesias

Dasper las chanzuns porscha il project REMAS er in cudesch cun las poesias en versiun originala ed en translaziun tudestga e franzosa e concerts cun la Kammerphilharmonie Grischun. Il project ha en mira la coesiun naziunala, stat sut il patrunadi da las regenzas dal chantun Grischun e Friburg e vegn sustegnì da Radiotelevisiun Svizra Rumantscha, da la Lia Rumantscha e dad auters.

En il «Magazin da cultura» discurra Mario Pacchioli l'emprima giada da REMAS e preschenta l'in u l'auter schatg dal nov disc cumpact.

En la rubrica litterara dain nus questa sonda in sguard sin la pli gronda fiera da cudeschs dal mund. Claudio Spescha rapporta live da la 69avla Frankfurter Buchmesse.

Redacziun: Rafael Müller