Possia il Magazin da cultura esser cun vus...

Star Wars: Ils films da science fiction da l'autur e reschissur George Lucas tutgan tar las pli renumadas ovras en l'istorgia da film. Ils films han fans sin l'entir mund. E bainbaud vegn il proxim - l'otgavel film da la retscha - en ils kinos.
Gea, blers enconuschan las figuras sco Luke Skywalker, Han Solo, la princessa Leia ubain Yoda u era citats dal film sco «Möge die Macht mit dir sein» u «Luke, ich bin dein Vater», schizunt sch'els n'han anc mai vesì in Star Wars. Star Wars n'è betg mo ina seria da films, mabain in vair fenomen.
Per eruir la clav da success dals films avain nus dumandà quels che san dir il meglier pertge ch'ils films funcziunan uschè bain: Trais fans cun corp ed olma grischuns - Jessica Maissen da Rabius, Gian Fadri Conrad da Müstair e Immanuel Siddharta Giger da Cuira. E l'expert e criticher da film da SRF Michael Sennhauser explitgescha en il Magazin da cultura, tge influenza che Star Wars ha gì sin la cultura da pop e pertge ch'ils films èn daventads talmain renumads.

Contribuziuns

Autur/a: Sabrina Bundi