Cabels, antennas e protestas

Internet svelt saja ozendi «infrastructura da basa», quai di almain il cusseglier guvernativ Marcus Caduff. En quel punct sto il chantun Grischun dentant anc far bler. In sguard sin tge ch'è avantmaun e tge che fiss planisà en Grischun.

Ina antenna da 5G sin ina chasa a Cuira.
Legenda da maletgs: Ina antenna da 5G sin ina chasa a Cuira. RTR, Flurin Clalüna

En Grischun il datti dapi l'onn 2018 in concept chantunal per bindels ultralads. Tenor il concept duess il Grischun avair «in plaz a la testa en il congual svizzer». Per il mument è quai dentant plitost ina visiun. Quai di Jon Erni, ch'ha collavurà vi dal concept.

«Per il mument essan nus – gist quai che pertutga la sveltezza da sur 100 mbits/s – propi a la cua da la Svizra.»

5G – La tschintgavla generaziun mobila

En il Grischun datti dapli antennas da 5G che quai ch'ins pensa. Per il mument chattan ins en il Grischun pli che 100 antennas cumpatiblas cun 5G. Per gronda part èn quai antennas da 3G u 4G ch'ins ha fabritgà or.

La mira da la Swisscom è stada, da porscher fin la fin dal 2019 a 90% dals Svizzers 5G. Sco ch'els communitgeschan curt avant Nadal 2019, saja quai er gartegià. Protestas en differentas vischnancas u perfin moratoris chantunals hajan dentant franà il progress.

Moderaziun: Georgina Janki, Redacziun: Flurin Clalüna