Dal vinars ad in fin dagut

L'organisaziun professiunala «DistiSuisse» premiescha mintgonn ils megliers destillaturs da la Svizra. La destillaria «Daguot» a Glion è vegnida premiada dacurt cun sis medaglias d'aur.

Fotografia d'in zanin
Legenda da maletgs: In fin dagut. RTR, E. Berther

La Marella era sa messa avant in onn e mez sin ils fastizs da la cultura da vinars en Surselva d'ier ed oz, ella è sa scuntrada cun l'anteriur hotelier ed ustier Leci Brugger, che raquinta dals temps cur ch'ils giasts pustavan anc in «pudel» – in magiel cun in deciliter vinars. «Oz è quai sa midà da la quantitad en meglra qualitad», ha ditg ses figl ed ustier Curdin Brugger.

Sper la qualitad è er dumandada la varietad. Ed uschia datti anc adina da quels che van e gievan a chavar ragischs da giansauna per far vinars, sco Robert Bundi da Surrein. E Beni Simeon e Robert Cathomas han gì durant la chatscha l'idea balurda da far ina atgna destillaria e da numnar quella «Daguot». Oz brischan els a Glion ina gronda varietad da vinars e fins daguts che han sco ch'i para success

Redacziun: Esther Berther