Las cifras da pernottaziuns crodan d'onn ad onn. Ed er per ils proxims onns n'èsi betg da quintar cun meglieraziun. Pertge pia anc investir en il turissem? E tge fiss il Grischun insumma, sch'i na dess nagin turissem pli tar nus? Pia insumma nagin – nagut – nagliur? Natira selvadia, in reservat per lufs ed urs?
Ensemen cun experts da l'economia è la «Marella» sa fatschentada cun la dumonda, tge potenzial ch'il Grischun avess sper il turissem. Ils experts che dattan resposta a quella dumonda èn Rudolf Minsch, directur da Economiesuisse e Peder Plaz dal Forum economic grischun. Dentant er il minister d'economia Jon Domenic Parolini raquinta, co che la politica emprova da rinforzar il Grischun.
Redacziun: Sabrina Bundi
