Lorenzo Cherubini alias Jovanotti, il rappunz e chantautur talian, è enconuschent er tar nus e quai gia dapi passa 20 onns, grazia a tocs sco «Serenata Rap», «Penso positivo» u «Lombelico del mondo».
Questa primavaira passada ha el publitgà ses 13avel album «Lorenzo 2015 cc.». Ils 10 da december 2015 vegn el a preschentar quel sin la tribuna dal Hallenstadion a Turitg. A questa chaschun ha l'artist concedì al Radio Rumantsch in'intervista exclusiva, nua ch'el discurra davart la tragedia actuala dals fugitivs ed il viagiar en general, davart las chanzuns d'amur e la fanta-scienza, davart la mort da la scena alternativa taliana ed ils donns chaschunads da la regenza Berlusconi. E, sa chapescha, er davart sia musica.
Redacziun: Benedetto Vigne
