La surdada – ina sfida cun u senza «Happy End»

En il chantun Grischun èn registradas passa 20'000 interpresas tenor statistica naziunala dal 2018. Numerusas da quellas èn actualmain en in process da midada. Ils uschenumnads «babyboomers» vegnan plaunsieu en la vegliadetgna da pensiun ed èn vid l'instradar il futur da lur affars.

La surdada – ina sfida cun u senza «Happy End»
Legenda da maletgs: La surdada d'ina fatschenta ad in successur u succesura n'è betg adina simpel. Colour

Uschia per exempel l'interpresa engiadinaisa Cafè Badilatti. Il possessur ha gia ditg cuntanschì la vegliadetgna da pensiun. Fin avant in pèr mais n'era anc nagina soluziun sin maisa. Uss haja dà ina reacziun surprendenta da ses trais figls.

Daniel Badilatti: «L'affar da famiglia na duai betg vegnir vendì ! »

L'affar da café a Zuoz tschertga actualmain ina nova direcziun. Bain pussaivel è che quella consista en avegnir da duas dunnas ! L'anteriura passlunghista Ursina Badilatti ha mussà interess da manar ils affars dal suvrin da ses bab. Decis n'è dentant anc nagut.

Max Gygax: «I fa mal il cor da vesair che tut quai che nus avain creà ed elavurà durant passa 30 onns, va uss simplamain a fin !»

Auters affarists en la vegliadetgna da 65 plus han gì da capitular e serran las portas da lur «ovra da vita» ils proxims mais. Per exempel la butia da mobiglia Woma a Samedan che surlascha il martgà uss ad ina chadaina da mobiglia danaisa. Per il possessur Max Gygax ina greva decisiun.

Yvonne Mayer: «Tge cletg che mia ovra viva vinavant !»

Ina buna soluziun per sia successiun ha chattà Yvonne Mayer-Capaul da Scuol per sia butia. Suenter 25 onns ha la dunna oriunda da Lumbrein surdà la butia Lolipop a sia emploiada che maina uss vinavant il «terz uffant» dad Yvonne Mayer-Capaul.

Corsin Nodèr: «Jau hai adina vulì rivar vinavant – uss sun jau mes agen schef»

Cuntanschì ina finamira fitg clera ha Corsin Nodèr da Scuol ils emprims da schaner da quest onn. El ha pudì surprender l'affar da ses pin e cuntinuar sia lavur en la garascha d'autos Noder SA a Susch sco nov schef. Il midament da rolla, da l'emploià al patrun, resenta l'um da 35 onns sco sfida, dentant per gronda part positiva.

Edwin Federspiel: «Da chalar uss cun noss affar è stà il dretg mument»

Ils trais cumpogns d'affar Zoffel, Zala e Federspiel, tuts trais en la vegliadetgna da 60 plus, han tschertgà ina successiun per lur affar Electro Engiadina SA. La fin dal 2018 è la decisiun crudada, els serran lur portas. Per ils emploiads e tut l'inventar haja dà l'ultim mument tuttina anc ina soluziun.

Redacziun: Anna Caprez