«La tatta dil patet-fuà»

In viadi plain aventuras als fastizs da l'uratta franzosa.

Ina veglia fotografia da Marie Thérèse e Jean Placide Cadruvi-Tirant
Legenda da maletgs: Marie Thérèse e Jean Placide Cadruvi-Tirant. MDA

Ins di ch'ina persuna è morta pir cur che nagin na sa regorda pli dad ella. En quest senn viva la «tatta dil patet-fuà» er passa otganta onns suenter sia mort e quai en famiglias zunt differentas.

Igl è stà in destin che l'uratta franzosa è vegnida a Ruschein. Per ella in destin dolurus, ma uschia èn ses descendents là nua ch'els èn ussa. Giuven e vegl, biadias e sut-sut-biadias. E la sut-sut-biadia Alice Bertogg è ida als fastizs da l'uratta franzosa e ha chattà ina gronda famiglia.

L'istorgia:

La primavaira 1889 èn Gion Placi Cadruvi, sia dunna Marie Thérèse Louise e lur dus uffants arrivads a Ruschein. Atgnamain na vulevan els betg pli turnar en la patria da Gion Placi. Quel era emigrads en il nord da la Frantscha a Boulogne-sur-Mer. Là aveva el lavurà sco mazler en in hotel e là aveva el emprendì d'enconuscher Marie Thérèse Louise. Els eran sa maridads ed han gì trais uffants en Frantscha.

Il figl pign era mort cun be nov mais e suenter che Gion Placi Cadruvi era sa blessà grevamain en in brischament è la famiglia giuvna turnada sin cussegl dal medi en ils culms da la Surselva.

Per Marie Thérèse Louise èsi franc stà ina dira decisiun da bandunar sco suletta figlia ses dachasa al port da l'Ocean Atlantic e da cumenzar ina nova vita en in vitg muntagnard, quasi milli kilometers davent da la patria. Marie Thérèse Louise ha gì da sa disar vid la mentalitad dals da Ruschein, ma oravant tut vid lur linguatg, ch'ella na chapiva betg. A Ruschein è la famiglia anc creschida per dus uffants. Gion Placi è dentant mort cun be 45 onns. Sia dunna, la franzosa, è restada a Ruschein.

Ed ella è era anc oz, passa 80 onns suenter sia mort, ina part impurtanta da la famiglia Cadruvi e ses descendents.

Autur/a: Alice Bertogg