Leschas, laders e lumpazis – 200 onns Sennhof a Cuira

Dapi il 1817 ha il Sennhof a Cuira – ch'è sco il num tradescha stà a l'entschatta ina chascharia – servì al chantun Grischun sco praschun per delinquentas e delinquents.

Il Sennhof a Cuira – ina praschun amez la citad.
Legenda da maletgs: Il Sennhof a Cuira – ina praschun amez la citad. RTR, Sabrina Bundi

Ed ina praschun è urgentamain stada necessaria, pertge avant la centralisaziun chastiava mintga vischnanca giudiziala tenor agen manegiar – ubain tenor il manegiar da la uschenumnada Carolina, in cudesch penal che cussegliava tge chasti decretar per tge delict. Il stgavazzar per exempel era ina moda anc digna, pertge quai gieva spert e na fascheva betg mal.


Lavurar che tuts vesan

E ils praschuniers stuevan lavurar, dentant amez la citad – ils vischins duain be vesair tge che capita, sch'ins surpassa la lescha. Ozendi na vesan ils vischins quasi nagut pli dals delinquents. E ch'il Sennhof sa chatta a l'ur da la citad veglia, è er daventà in problem: Il pur da vin che cultivescha las vignas dasperas, po vegnir enfin sin fanestra da la tur, quai na correspunda betg pli a las normas da segirezza.
Co è quai oz d'abitar sper la praschun, da lavurar en praschun ubain er dad esser en praschun? Nus ans approximain a l'instituziun Sennhof or da trais perspectivas - in pèr vischin, in praschunier ed in guardian.

Autur/a: Sabrina Bundi