Siglir tar il cuntegn

Header

Navigaziun

Legenda: Tadlar il audio Nossa bumba. Durada 42:28 minutas.
Or da Marella dals 04.08.2019.
cuntegn

Marella Nossa bumba

Las smanatschas cun bumbas atomaras ha puspè conjunctura en la politica mundiala. Avant 60 onns avev’ins er cumprà en Svizra uran per fabritgar in’atgna bumba atomara.

Suenter la segunda guerra mundiala, l'onn 1946, ha la Confederaziun instradà in program dad armas atomaras. A la testa era il renumà fisicher e professer da l’ETH Paul Scherrer. Betg mo ils scienziads per construir la bumba eran pronts, er il material principal aveva la Confederaziun gia organisà: 10 tonnas uran ord il Congo, magasinà en bunkers a Wimmis en il chantun Berna.

Il cussegl federal è da l’avis che l’armada stoppia disponer las armas las pli effizientas. Tar quellas fan part las bumbas atomaras.
Autur: Cussegl federal da la Svizra1958
Fotografia dal document uffizial dal 1958
Legenda: Il palpiri uffizial da Cussegl federal ha procurà il 1958 per fermas reacziuns a l'ester. SRF

Dentant: La fin finala è la bumba atomara da la Svizra restada be ina bumba sin il palpiri. Bandunà definitivamain ils plans per in’atgna bumba han ins pir il 1988.

Fotografia en alv e nair d'ina demonstraziun a Losanna il 1959
Legenda: Demonstraziun cunter la bumba atomara svizra il 1959 a Losanna Museum naziunal svizzer

La Marella raquinta l’istorgia da la bumba atomara svizra. Dentant èn oz las bumbas atomaras e smanatschas cun culps atomars puspè turnadas sin il parchet politic. Avant in onn smanatschavan ils Stadis Unids da l’America e la Corea dal Nord d’avair il maun gia pront dasper il buttun. Actualmain aud’ins sumegliants tuns tranter ils Stadis Unids ed il Iran. Kim Jong Un e Donald Trump perencunter discurran en il fratemp «d’ina amicizia grondiusa».

Armas nuclearas han plitost in'impurtanza politica che militara.
Autur: Jürg Stüssi-LauterburgIstoricher da militar

En questa repetiziun dal mars 2018 vesan ins quant spert che la situaziun politica po sa midar, dentant era che ils musters da basa en il poker da pussanza restan ils medems sco avant in onn o avant 60 o 70 onns.

Marella 09:00