«Radikal reduziert» – Bertolt Brecht a Cuira

Avant 70 onns ha gì lieu a Cuira la premiera da la «Antigone des Sophokles» da e cun Bertolt Brecht sco reschissur. Per l'istorgia dal teater in'inscenaziun-clav, per il public dal 1948 in'irritaziun e provocaziun.

Fotografia en alv e nair da l'iscenaziun da l'Antigone des Sophokles da Bertolt Brecht il 1948 a Cuira
Legenda da maletgs: Helene Weigel (entamez) sco Antigone il 1948 a Curia. Fotografia ord la documentaziun «Antigonemodell 1948». RTR, A.S. Campell

En l'anteriur teater da la citad da Curia sa chatta oz in tempel da consum. Ed il Cinema Superstore en il Rätushof fa gugent reclama cun «Radikal reduziert!!!». En la butia sezza però sa chatta anc pli u main l'infrastructura intacta dal vegl teater. Empè da vender vestgadira vegniva mussà avant 70 onns en quest lieu la «Antigone des Sophokles» da Bertolt Brecht. In'inscenaziun che ha fatg furora da ses temp e resuna fin oz.

Entant che l'inscenaziun da model n'ha insumma betg plaschì a quels da Cuira, è ella daventada in'inscenaziun da grond'impurtanza per l'istorgia dal teater. Pertge è Brecht vegnì precis a Cuira? E tge era propi nov vi da sia inscenaziun? Era er Brecht «radikal reduziert»? Quest atun, en occasiun da l'anniversari da 70 onns Brecht a Cuira, returna la «Antigone des Sophokles» puspè sin il palc da la chapitala grischuna. Nus repetin per quest'occasiun ina Marella realisada l'onn 2013.

Autur/a: Anna Serarda Campell