«Sin il viv!» – 112 Impuls en turnea

Per festivar il 25avel anniversari da l'emissiun ha RTR envidà a la turnea «Sin il viv!» En iert, en garascha u en il salun da coiffeur han 26 auturas ed auturs prelegì live 112 impuls.

Fotografia dal public en la garascha Oberalp a Sedrun
Legenda da maletgs: Sin il viv! Il schaner ha la turnea fatg staziun en garascha a Sedrun. RTR, Jérémie Sarbach

Per la fin da l'onn lascha la Marella reviver ils set inscunters che RTR ha organisà quest onn en lieus tut spezials, nua che auturas ed auturs dals Impuls han prelegì davant public quels texts ch'ins auda uschiglio mintga damaun al radio.

In'ura plain istorgias e vistas surprendentas sin noss mintgadi: L'istorgia da Jaja Uorschla che zercla ad in zerclar, davart la sfida da far stgandlers, daco che Bettina Secchi ha fadia cun chasas veglias engiadinaisas e Rut Plouda cun il tatgariel u lura las aventuras da Leo Tuor sch'el fa viadi en tren vers la Surselva. A pled vegn era Flurina Badel, la redactura da l'emissiun Impuls e manadra dal project «Sin il viv!».

Redacziun: Guadench Dazzi