La Marella ha tranter auter discurrì cun Riet Bulfoni (mecatronist) ed Irina Tuor (la meglra spezialista da sanadad dal mund) Els han fatg il pass dals Swiss Skills als World Skills, ils campiunadis mundials da professiun l'onn passà ad Abu Dhabi.
Tge vul la Confederaziun e tge porti a las fatschentas?
A pled vegnan er ils responsabels per Swiss e World Skills tar ina fatschenta pitschna ed ina gronda. Fatschentas nua che las premissas per laschar participar emprendistas ed emprendists als campiunadis èn dal tuttafatg differentas.
Plinavant sclerescha Josef Widmer, il vicedirectur dal Secretariat da stadi per furmaziun, retschertga ed innovaziun, pertge che la Confederaziun è la pli gronda promotura dals campiunadis svizzers. Ella surpiglia numnadamain 10 dals total 17 milliuns francs che l'event custa. Quai ch'è ina gronda summa en cumparegliaziun cun sustegns per autras spartas da la furmaziun.
In svilup enorm
Il svilup enorm ch'ils campiunadis da professiun han fatg ils ultims onns sa mussa en il discurs cun Diego Poltera. El è stà l'emprim candidat che la Hamilton a Panaduz ha tramiss l'onn 2006 als Swiss Skills.
El è dal reminent daventà lezza giada campiun svizzer. E quai cun be intgins dis supplementars da preparaziun. Ozendi investescha la Hamilton plirs tschientmillis francs per la preparaziun da lur candidats.
