Tavulin litterar – Dumagnar la vita cun leger e scriver

Al Tavulin litterar sa scuntran questa giada Bettina Vital, romanista ed amatura da cudeschs, e Claudia Knapp, dunna da cultura e cuntadina d'ulivas.

Claudia Knapp e Bettina Vital.
Legenda da maletgs: Claudia Knapp e Bettina Vital. RTR, Esther Krättli

En il center da l'emissiun stattan dus cudeschs da duas auturas franzosas, cudeschs, ch'i dat dapi dacurt era en tudestg. Discutà vegn sur da «Das Mädchen, das in der Metro las» da Christine Féret-Fleury e «Erinnerung eines Mädchens» da l'autura da success Annie Ernaux.

Cun ina precisiun senza resguard quinta Annie Ernaux da ses emprim inscunter sexual, da pussanza e sutmissiun. Ina plaja che na guarescha mai sin il viadi vers sasezza.

«Das Mädchen, das in der Metro las» è l'istorgia d'ina giuvna che observa tge cudeschs che la glieud en la metro legia. In di sorta ella duas staziuns avant e sa chatta per casualitad en in mund plain cudeschs.

Redacziun: Esther Krättli